 Xosé Isorna, en Noia / foto de Roberto Lista |  Xosé Isorna, nos seus tempos de Delegado Diocesano de Medios de Comunicación |
En Noia, onde residiu nos seus últimos tempos, acaba de falecer aos 95 anos de idade frei Xosé Isorna Ferreirós (Cordeiro-Valga, 1921 – Santiago de Compostela, 2016), un histórico franciscano galeguista e xornalista da Igrexa durante case trinta anos. Comprometido coa galeguización da Igrexa en tempos complicados para o idioma de Galicia, tratou a intelectuais como Castelao, Ramón Otero Pedrayo ou Álvaro Cunqueiro, entre outros, e a súa relación co galeguismo quedou tamén patente nas homilías fúnebres que pronunciou nos funerais de Xosé Ferro Couselo, Ramón Otero Pedrayo ou Sebastián Martínez-Risco, que faleceu en 1977 sendo presidente da Real Academia Galega (RAG). Ademais, durante moitos anos chegou a todos os fogares de Galicia coa súa misa dominical na Televisión de Galicia (TVG), que presidía en galego.
Aos seus trece anos de idade entrou no convento-seminario franciscano de Herbón, onde fixo os seus primeiros estudos, logo continuou a súa formación no convento de San Francisco de Santiago de Compostela. Como sacerdote franciscano traballou ademais nos conventos de San Francisco o Grande en Madrid, en Ourense e en Pontevedra.
Viaxou a Arxentina, Cuba, Venezuela, Estados Unidos, Terra Santa, Marrocos, México, onde visitou os restos de Sebastián de Aparicio que se gardan no Convento de San Francisco de Puebla de los Ángeles.
Era sacerdote franciscano desde hai máis de setenta anos. Foi profesor de Humanidades no Seminario de Herbón, Profesor de Elocuencia Sagrada no Teologado Franciscano de Santiago, Director da revista “El Eco Franciscano”, e colaborador habitual da prensa, radio e televisión. Tamén era membro da Real Academia Galega da Lingua. Durante preto de trinta anos foi Delegado Diocesano de Medios de Comunicación Social.
Volcado no apoio espiritual e social, desde a humildade e austeridade franciscanas, ten no seu haber numerosas publicacións, na súa maioría de espiritualidade ou relativas a Galicia e á espiritualidade. Entre elas podemos destacar as seguintes: “Velando a un enfermo”, “Así fue esta mujer: Clara de Asís”, “Itinerario del alma a Santiago: guía del peregrino”, “Desde mi convento flotante” y “Glosas Evangélicas”, nome dunha sección semanal que se publicou no xornal santiagués “El Correo Gallego”. Co doctor en Teoloxía Gumersindo Meiriño publicou o libro “De empresario a Santo”, sobre a vida de San Sebastián de Aparicio. En galego, publicou “Galicia: ¡Podes!, Galicia: ¡Poderás!”. Traballou en Radio Televisión de Galicia durante máis de vinte anos. Ademais dictou conferencias sobre Martínez Risco, Otero Pedrayo, Camilo José Cela, Félix Rodríguez de la Fuente e sobre o seu paisano Ferro Couselo, entre outros.
Recibiu numerosos trofeos e distincións que xalonan a súa fecunda vida xornalística, cultural e espiritual. Entre eles o Premio Bravo e o Premio Diego Bernal (2012), este último outorgado polos xornalistas de Compostela. “Co pai Isorna non temos que entrar en disquisicións sobre divinidades. Este frade é moi humano. Xosé Isorna é un dos curas máis humanos que coñezo. É un amigo, tenmo demostrado sempre. Sempre que acudín a el, estaba”, eloxiou nesa ocasión o xornalista Juan López Rico, para confesar de seguido: “Como cura, bautizou a unha das miñas fillas e, como cura (tamén como amigo) acompañoume a Ribadeo e oficiou a misa pola morte da miña nai. ¡¿Qué máis lle podemos pedir como cura?! Pero eu quero decir estas catro palabras sobre o humano que é o pai Isorna. O amigo e o compañeiro de oficio, porque Isorna é o noso xornalista na Igrexa”.
Fuente RSS
