Arredor de 250 exalumnos e as súas compañeiras concorreron ao XIII Encontro Anual de Exalumnos de Herbón celebrado o sábado en Santiago e que comezou cunha camiñata de catro quilómetros dende o Monte do Gozo ata a igrexa de San Francisco, onde o presidente do XIII Encontro, o arcebispo franciscano monseñor Xosé R. Carballo, presidiu o acto de bendición dun tríptico adicado a San Francisco da pintora madrileña Raquel Clemente Rubio, dona do exalumno Xosé Luis Rivas Guisado. Na catedral monseñor Carballo proclamou que "relixiosos e laicos seguimos a considerármonos franciscanos xa que necesitámonos uns aos outros", xusto antes de que botara a andar o botafumeiro.

A ofrenda ao Apóstolo fíxoa o presidente da Asociación Amigos de San Francisco de Asís, Ricardo Seguín, quen lembrou As Floriñas nas que se relata que "nos comezos da Orde, cando aínda eran poucos os irmáns e aínda non había conventos, San Francisco foi por devoción a Santiago de Galicia... estando de noite en oración na igrexa de Santiago foille revelado por Deus a San Francisco que fundara moitos conventos naquelas terras".

De seguido o presidente da comisión organizadora dos Encontros, Xoán Manuel Carpintero, impúxolle a frei Henrique Roberto Lista  o Premio Esclavina de Prata 2014 despois de relatar a súa longa traxectoria de frade, ben coñecido en Galicia por dirixir o programa da Televisión de Galicia Polo camiño da fe.

Aos sons da Real Banda de Gaitas de Ourense, os asistentes a este acto relixioso encamiñáronse á carpa situada na horta do convento de San Francisco, onde se celebrou o xantar de irmandade e se entregaron 36 novos diplomas de Cabaleiros Franciscanos a outros tantos exalumnos e frades. Tamén se presentou o libro El Tiempo de la Memoria, que relata os recordos e vivencias do exalumno J. Ramón Rey García da súa estadía de cinco anos no seminario franciscano de Herbón (1955-1960), "a primeira vez que un exalumno escribe como era o colexio e as súas relacións con compañeiros, profesores, mestres e frades", segundo Suso García, epiloguista do libro.

A este XIII Encontro Anual de Exalumnos asistiron tamén a directora xeral de Turismo, Nava Castro, o director da Sociedade de Xestión do Xacobeo, Rafael Sánchez Bargiela, o profesor e historiador da Arte, Xosé Manuel García Iglesias, o Provincial dos franciscanos de Galicia, frei Xosé Manuel Castiñeira, o primeiro Premio Esclavina de Prata 2013, Roxelio González Escaleira, e o recoñecido pintor e exalumno Antón Lamazares, que mantén aberta a súa mostra conmemorativa On the road no Pazo de Xelmírez, visitada nun mes por máis de 10.000 persoas.

(Ver fotos do XIII Encontro Anual)

A directora de Turismo de Galicia, Nava Castro Domínguez, presentou hoxe a tradución ao galego do libro ‘As floriñas de San Francisco’, unha acción divulgativa que se enmarca nos actos conmemorativos do VIII Centenario da Peregrinación de San Francisco de Asís a Santiago e que se celebrou en Compostela na data que se conmemora o Día Mundial do Libro.
Na presentación interviron tamén Xosé Antonio Castiñeira, ministro provincial dos Franciscanos en Galicia, o tradutor Darío Xohán Cabana e máis o coeditor, Henrique Alvarellos.

Co gallo desta conmemoración edítase por primeira vez en lingua galega o célebre texto do século XIV sobre a vida do Santo de Asís. A tradición da peregrinación de San Francisco de Asís a Santiago parte das fontes franciscanas denominadas Actus Beati Francisci et Sociorum Eius, unha recompilación de finais do século XIII da vida e actos de San Francisco e os seus discípulos que se sintetiza nesta obra maxistralmente traducida do italiano medieval por Darío Xohán Cabana, un dos grandes expertos mundiais en literatura medieval italiana, e magnificamente ilustrada por Darío Basso. A tradución é pura dende o idioma orixinal.

A directora de Turismo explicou na súa intervención que, foi na Catedral de Santiago, segundo se recolle no capítulo IV desta obra, onde lle foi revelado ao Santo de Asís a súa misión de espallar a súa Orde polo mundo. ‘As Floriñas’ ten sido traducida a varios idiomas e conta con máis de 50 capítulos, cuxas letras capitulares foron feitas unha a unha e deseñadas polo ilustrador Darío Basso, que realizou outras 17 acuarelas para a edición. Segundo comentou Nava Castro, “trátase dun libro estético, unha pequena xoia bibliográfica que conservar como lembranza desta conmemoración e das ensinanzas do santo de Asís”. E engadiu que “a través dos actos conmemorativos deste VIII Centenario achegámonos á figura de San Francisco de Asís e á súa vinculación co culto xacobeo a través de diversas perspectivas”.

 Segundo lembrou a directora de Turismo, foi precisamente Asís, a terra de San Francisco acolleu o primeiro dos eventos da conmemoración, a mostra Peregrino e Novo Apóstol. San Francisco no Camiño de Santiago, que se puido visitar o pasado verán e que neste verán 2014 chegará nunha versión ampliada ao compostelán Pazo de Fonseca.

Outros proxectos expositivos relevantes desta conmemoración foron San Francisco e o Belén, que se puido ver en Compostela este Nadal e que foi visitada por máis de 28 mil persoas. Nava Castro tamén comentou que neste momento, Compostela acolle dúas mostras enmarcadas nos actos relacionados coa efeméride. Unha delas é Auga Doce, unha exposición con diferentes expresións artísticas que pode visitarse na Cidade da Cultura ata setembro. E a outra, Il Cammino di Francesc, unha mostra fotográfica de Steve McCurry que percorre os lugares e espazos sagrados da vida de San Francisco a través dos ollos deste prestixioso fotógrafo da Axencia Magnum.

Ademais, avanzou que Turismo de Galicia traballa na mostra On The Road, o gran proxecto expositivo do centenario; unha mostra de arte moderna que se desenvolverá no Pazo de Xelmírez e mais na igrexa e no cemiterio de Bonaval.

Proxectos expositivos itinerantes complementan a dinamización cultural do centenario, xunto coas programacións musicais e teatrais, como o programa Cultura no Camiño, que dende abril a setembro dinamiza con espectáculos as vilas xacobeas; ou as actuacións da Nova Galega de Danza, o festival de Música Sacra ou ciclos de cinema de temática franciscana.

A programación do centenario conta tamén con grandes citas congresuai. Así, o primeiro Congreso de Peregrinacións e Turismo organizado en colaboración coa Organización Mundial del Turismo e a Secretaria de Estado de Turismo; o I Cumio de Asociacións de Amigos do Camiño de Santiago, que reunirá por primeira vez en Galicia aos representantes das Asociacións de Amigos do Camiño que existen por todo o mundo.

Ademais, Galicia acollerá este verán a Primeira Travesía Náutica Xacobea, que percorrerá máis de 1.500 millas náuticas e recalará en 14 portos de Italia, Francia, España e Portugal antes de chegar a Galicia, na súa Ruta Mediterránea e partirá de Inglaterra, Irlanda e Francia para confluír nas Rías Baixas coas embarcacións da Ruta Mediterránea.