Medio cento de
exalumnos arroupan en O Cebreiro a frei Roberto Freire
Frei Roberto Freire recibiu un agasallo de apoio e recoñecemento por parte de Roxelio González e Xoán Manuel Carpintero no decurso do xantar de irmandade dos exalumnos de Herbón
O Cebreiro (Lugo), 10 de novembro 2013
Máis de medio cento de exalumnos renderon unha merecida homenaxe a frei Roberto Freire Hernando en O Cebreiro, o seu novo destino despois de moitos anos ao fronte de Herbón, onde os exalumnos sempre fumos acollidos co mesmo agarimo que tamén profesamos a este antigo centro de formación onde fumos educados.
O encontro de O Cebreiro (1.293 metros de altitude) comezou cunha misa oficiada por frei Roberto e frei Enrique Lista coa axuda de frei Xosé Quintela, quen ao remate fixo un percorrido pola historia do santuario, que acolle non só a lenda do Santo Grial de Galicia senón tamén os restos do afamado cura don Elías Valiña, o grande precursor nos anos sesenta do Camiño de Santiago e da rehabilitación do Camiño Francés e do núcleo de O Cebreiro. A misa foi cantada polo Coro de Exalumnos baixo a batuta de Manolo Rico e os sons armoniosos de Anxo Viro.
O xantar de irmandade celebrouse no primeiro andar do Mesón Carolo. O presidente da comisión organizadora dos Encontros, Xoán Manuel Carpintero, tivo palabras de alento, apoio, recoñecemento e gratitude a frei Roberto non só pola acollida fraterna con que sempre recibiu aos exalumnos senón tamén pola súa iniciativa truncada de alentar diferentes movementos sociais e humanitarios nos muros do convento padronés, polo que "desexamos que nun tempo non moi lonxano poida retornar á súa e nosa querida terra das ribeiras do Ulla", dixo Carpintero, quen lembrou "as dorosas circunstancias da súa última etapa en Herbón, das que, malia a todo, saíu coa súa integridade ben ergueita".
Roxelio González Escaleira, recente premio Esclavina de Prata, entregoulle a frei Roberto un agasallo de recordo co aplauso de respaldo e recoñecemento de todos os exalumnos, entre os que destacou a abondosa presenza dos procedentes da provincia de León e, nomeadamente, da veciña comarca do Bierzo.
Na reunión tamén se analizou o anteproxecto de novos estatutos da Asociación Socio-Cultural Amigos de San Francisco de Asís, artellados polo músico e lingüista Manolo Rico, así como tamén a iniciativa de frei Roberto Lista de viaxe-peregrinación a Asís do 10 ao 18 de maio do 2014 aproveitando a conmemoración dos 800 anos da viaxe de San Francisco a España e Galicia.
(Visita virtual a O Cebreiro)
(Fotos de recordo do encontro obtidas cunha máquina reflex Panasonic Lumix Mega OIS/28 mm.)
A contorna e a igrexa
O xantar de irmandade e a homenaxe
